TENGA : TUNAVIKATA VILABU MADENI YETU KUTOKA PESA ZA MDHAMINI.

SHIRIKISHO la Soka Tanzania (TFF) limesema litazikata baadhi ya klabu sehemu ya fedha zitakazotolewa na wadhamini wa Ligi Kuu ya Soka Tanzania Bara (Vodacom), ili kufidia  deni linalozidai klabu hizo.

Akizungumza na waandhishi wa habari hii leo, Rais wa TFF Leodegar Tenga amesema hatua hiyo ina lengo la kufidia madeni yao baada ya klabu hizo kutolipa kwa muda mrefu.

Tenga amebainisha madeni hayo kufuatia kujitokeza kwa baadhi ya vilabu ambavyo vimejitokeza mbele ya vyombo vya habari na kusema kuwa vinaidai TFF fedha zilizotolewa na na wadhamini hao kwenye msimu wa 2011.

"Ni kweli kuwa kuna klabu chache ambazo zinadai malipo ya fedha kutoka kwa wadhamini za msimu uliopita, lakini TFF kama baba na klabu ni watoto. Hivyo  nasi kuna klabu kadhaa ambazo tunazidai, nasi tutazikata kutoka kwenye fedha za wadhamini zinzotarajiwa kupatikana hivi karibuni," alisema.

Tenga amesema kinachofanyika kwa sasa ni kuwapa kazi wakaguzi wa mahesabu, ambao amesema  watapitia madeni ya vitabu na mahesabu kufanyika ili kubaini ni klabu gani na kiasi gani kinachodaiwa.

Amesema klabu hizo zililipiwa madeni kwenye Shirikisho la Soka Afrika (CAF), baada ya kufanya makosa na kutatakiwa kulipa faini.

Wakati huo huo, Tenga ametoa wito kwa wadau na wamiliki wa makampuni na taasisi za fedha, kujitokeza kwa wingi na kuzidhamini timu za taifa za vijana  na ile ya wanawake (Twiga Stars).

Amesema kwa kufanya hivyo ni wazi kutaziwezesha timu hizo kuwa na uwezo wa kufanya maandalizi mazuri na ya muda mrefu kabla ya kukabiliana na ushiriki kwenye michuano ya kimataifa.

 

Katika hatua nyingine Tenga amezitaka klabu ambazo mechi zake zitaonyeshwa na kituo cha televisheni cha Super Sports cha Afrika Kusini, kuonyesha soka safi ili kulitangaza vema soka la Tanzania.