MATUSI YA ASHLEY COLE YALETA SHERIA MPYA SOKA LA ENGLAND, WANAO JIRUSHA "DIVERS" KUSHUGHULIKIWA ANASEMA MAKAMU WA RAIS FIFA NA TITO VILANOVA KUMKOSA BUSQUETS MICHEZO MIWILI ULAYA.

Mwenyekiti wa chama cha soka nchini England David Bernstein anatarajia kuzindua sheria mpya ya kimaadili kwa ajili ya wachezaji wa timu ya taifa ya England.

 

Hatua hiyo inafuatia kujitokeza kwa vitendo vya uvunjifu wa nidhamu kutoka kwa wachezaji wa kimataifa na zaidi akinyooshewa kidole mlinzi Ashley Cole.

Kwa mujibu wa taarifa iliyotolewa na FA ni kwamba kwa mchezaji yoyote atakaye vunja sheria hiyo basi atasimamishwa kuitumikia timu ya taifa.

Amenukuliwa Bernstein akisema

"kuna wachezaji ambao wanapaswa kuwa mfano wa kuigwa na wanasifa nzuri iliyotukuka na pia wanatakiwa kuonyesha tabia nzuri ni muhimu "

"na sheria hii ilipaswa kuletwa miaka mingi nyuma."

    “kama kuna mtu atafanya ndivyo sivyo tutakuwa

na uwezo wa kumuonya au kumsimamisha kucheza soka England”

Cole aliingia matatizoni baada ya kutuma ujumbe katika ukurasa wake wa mtandao wa kijamii wa twitter akikitukana chama cha soka nchini England FA kuelekea kusikilizwa kwa shauri la mchezaji mwenzake mlinzi John Terry.

("Hahahahaa, well done #fa I lied did I, #BUNCHOFT***S".)

Lakini hata hivyo mlinzi huyo wa kushoto mwenye umri wa miaka 31 baadaye aliufuta ujumbe huo na kumuomba radhi Bernstein kabla ya kukutana jumanne na Prince William wakati wa hafla ya ufunguzi rasmi wa kituo kipya cha  FA kilichopo St George's Park on Tuesday.

Kwasasa bado mlinzi huyo wa Chelsea ambaye ameitumikia England michezo 98 anakabiliwa na tuhuma hizo ambapo anatakiwa kujibu tuhuma zake hizo kabla ya saa moja usiku wa kesho October 11.

MAKAMU WA RAIS FIFA JIM BOYCE ANASEMA KUJIRUSHA KWA WACHEZAJI ENEO LA HATARI KAMA KANSA MCHEZONI

Makama wa Rais wa shirikisho la soka duniani Fifa Jim Boyce amesema anaamini kitendo cha kujirusha ndani ya eneo la hatari sasa kimekuwa kama ugonjwa wa kansa.

Boyce ametoa kauli hiyo baada ya kuangalia mchezo baina ya Liverpool dhidi ya Stoke mchezo uliochezwa katika dimba la Anfield ambapo alimshuhudia Luis Suarez akijiangusha ndani ya eneo hilo katika mchezo uliomalizika kwa matokeo ya bila kufungana.

Amenukuliwa akisema,

"Nimeona matukio mengi ikiwa ni pamoja na hili la Suarez na kwangu mimi hakuna kitu isipokuwa ni udanganyifu" 

    Akaenda mbali kwa kusema,

“hili linaweza kushughulikiwa na kamati za nidhamu kama inavyofanyika katika vyama vingine na kwamba hiyo ndiyo njia sahihi ya kufanya”

"Sasa linakuwa kama ugonjwa wa kansa ndani ya mchezo . Endapo itathibitika kuwa ni kweli mchezaji kafanya hivyo wanapaswa kuadhibiwa."

Mwezi September, bosi wa Stoke Tony Pulis alitaka FA kuwaadhibu wale watakao bainika kufanya vitendo vya kujirusha kwa kusimamishwa michezo mitatu.

Na jumapili iliyopita akarejea kwa kusema mshambuliaji Suarez alistahili kusimamishwa michezo hiyo baada ya kujirusha katika mchezo uliochezwa Anfield na kutoa  matokeo ya kutokufungana.

Busquets asimamishwa michezo miwili ya vilabu bingwa ulaya.

Kocha wa Barcelona Tito Vilanova ataikosa huduma ya Sergio Busquets katika michezo miwili ijayo ya vilabu bingwa ulaya dhidi ya Celtic kufuatia shirikisho la soka barani ulaya UEFA kuamua kumsimamisha kiungo huyo kwa michezo miwili kutokana na kufanya ndivyo sivyo katika mchezo dhidi ya Benfica wiki iliyopita.

Kiungo huyo wa kimataifa wa Hispania alionyeshwa kadi nyekundu ya moja kwa moja na mwamuzi wa kituruki Cuneyt Cakir baada ya kumchezea rafu mbaya Aguias wa Benfica, katika mchezo ambao Catalans walishinda kwa mabao 2-0.

Bodi ya udhibiti na nidhamu ya UEFA imelitazama suala hilo na kulitolea maamuzi ya kwamba Busquets asimame michezo miwili.

Kiungo huyo mwenye umri wa miaka 24 atakosekana katika mchezo wa kwanza katika uwanja wa nyumbani dhidi ya Celtic  Oct 23 lakini pia atakosekana katika mchezo wa marudiano wiki mbili baadaye.

Barcelona kwasasa wako katika kilele cha kundi G wakiwa na alama sita baada ya kushuka dimbani michezo miwili, ilhali Celtic wako katika nafasi ya pili baada ya kukusanya alama nne.