CESC FABREGAS KUSAJILIWA NA MANCHESTER UNITED.

Klabu ya Manchester United imewasilisha ombi la kutaka kumsajili mcheza kiungo wa klabu ya Barcelona Cesc Fabregas.

Ripoti zinasema kuwa Manchester United inataka kumsajili mchezaji huyo wa zamani wa Arsenal kwa kitita cha pauni milioni ishirini na tano.

Wasimamizi wa Barcelona kwa sasa wanajadili pendekezo hilo, lakini inaaminika kuwa kiasi walichopendekeza ni kidogo.

Licha ya kuwa Fabregas hajaomba kuruhusiwa kuondoka, lakini kuna fununu kuwa huenda akashawishika kurejea tena nchini England.

Mchezaji huyo mwenye umri wa miaka 26, huenda akakubali kujiunga na Manchester United ikiwa wasimizi wa Barcelona watakubali kiasi kilichopendekezwa na Manchester United.

Wanariadha Tyson Gay na Asafa Powel walitumia madawa haramu.

Wanariadha wawili kati ya wanariadha wenye kasi kubwa duniani Tyson Gay, kutoka Marekani na Asafa Powell wa Jamaica  wamepatikana na kosa kutumia madawa ya kusisimua misuli.

Gay, ambaye ni mwanariadha wa pili kwa kuwa na kasi kubwa ya kukimbia katika mbio za mita mia moja, amesema anajiondoa kwenye mashindano ya dunia ya riadha yanayotarajiwa kufanyika mjini Moscow mwezi ujao.
Asafa Powell, ambaye alishikilia rekodi ya mbio za mita 100 hadi ilipovunjwa na Usain Bolt mwaka 2008, amekanusha kuwa alitumia dawa hizo makusudi.
Mwanariadha mwenzake wa Jamaica Sherone Simpson pia amepatikana na hatia ya kuzitumia dawa hizo za kusisimua misuli.