Olimpiki: Michezo ya Sochi yafunguliwa rasmi Medali zaanza kunyakuliwa

Ufunguzi wa michezo ya olimpiki ya majira ya baridi mjini Sochi ulifanyika jana Ijumaa(07.02.2014) kwa tamasha kubwa la kuvutia lililoshuhudiwa na rais Vladimir Putin wa Urusi.

Rais Putin amelenga kutuliza hofu za mashambulizi ya kijeshi na pia kuondoa mzozo kuhusiana na haki za mashoga , hali iliyotia doa wakati mashindano hayo yanakaribia kuanza.

Putin ameimarisha hadhi yake kwa nchi yake kuwa mwenyeji wa mashindano salama na ya mafanikio ya olimpiki katika mji wa kitalii katika bahari nyeusi wa Sochi, ambako tamasha la ufunguzi lililokuwa na kila aina ya shamra shamra katika uwanja uliosheheni watazamaji 40,000 katika uwanja mpya wa Fisht uliashiria mwanzo wa mashindano hayo kwa ukamilifu.

Sherehe za ufunguzi wa michezo ya Olimpiki

"Natangaza mashindano haya ya 22 kuwa yamefunguliwa" amesema Putin akifungua rasmi tukio hilo ambalo anatarajia kuwa litasafisha heba yake pamoja na nchi yake duniani. Rais wa kamati ya kimataifa ya olimpiki Thomas Bach amesema haya yatakuwa mashindano ya kuvutia.

"Kuna hamasa kubwa na nina matarajio mwenge wa olimpiki ukiwaka katika uwanja wa olimpiki, hata wanamichezo watakuwa katika hali kama hiyo na nina hakika litakuwa tamasha la kufurahisha."

Rais Putin kushoto akiwa katika sherehe za ufunguzi

Gharama za mashindano

Watayarishaji wametetea gharama za kuendesha mashindano hayo ya Sochi huku kukiwa na wasi wasi kutoka kwa maafisa wa olimpiki kuwa gharama kubwa huenda ikawaweka wadhamini kando katika mashindano yajayo.

Licha ya manung'uniko ya hapa na pale kuhusu maeneo ya malazi ambayo hayakukamilika katika sehemu kadha , hali miongoni wa washiriki wa mashindano hayo pamoja na maafisa wao baada ya michezo kadha ya mwanzo mjini Sochi imekuwa ya matumaini.

Wanamichezo wa Marekani wakiingia uwanjani

Michezo hiyo imeanza kwa wanamichezo kushindana katika michezo mbali mbali.

Mwanariadha wa Marekani Sage Kotsenburg amekuwa mwanariadha wa kwanza kunyakua medali ya kwanza ya dhahabu katika michezo ya Olimpiki ya Majira ya Baridi huko Sochi nchini Urusi.

Sage Kotsenburg, amenyakua medali hiyo katika mchezo wa kuteteleza katika barafu kwa kwa kutumia ubao kwa upande wa wanaume, ukiwa ni mmoja katika michezo 12 mipya iliyoingizwa katika michuano hiyo, ili kuwavutia vijana.

Mwanamke wa kwanza kushinda medali ya dhahabu ni Marit Bjoergen wa Norway,katika mbio za marathon za kilomita 15. Umati mkubwa wa mashabiki wa Uholanzi wanatarajiwa kumshangilia bingwa mtetezi wa mchezo wa kuteleza katika barafu, Sven Kramer, akijaribu kutetea taji lake kwa upande wa wanaume mita elfu tano.

Rais Vladmir Putin wa Urusi alifungua rasmi jana(Ijumaa), mashindano ya Olimpiki ya majira ya baridi katika mji wa utalii wa Sochi katika sherehe zilizofana.

Waliokuwa wanariadha mashuhuri nchini Urusi waliubeba mwenge wa Olimpiki kabla ya kuwashwa na aliyekuwa mlinda lango wa mchezo wa magongo Vladislav Tretiak pamoja na mchoraji wa barafu Irina Rodnina.

Katika siku 16 zijazo,karibia wanariadha 3000 watashiriki katika michezo mbalimbali 98 katika mashindano hayo yaliodaiwa kugharimu takriban dola billioni 50.

 Bundesliga

Son Hueng Min wa Leverkusen akifurahia bao lake

Na katika kandanda, ligi ya Bundesliga imeingia katika mchezo wake wa 20 jana Ijumaa wakati Bayer Leverkusen ilifanikiwa kushinda mchezo wa kwanza kwa bao 1-0 dhidi ya Borussia Moenchengladbach na kuendeleza vipigo dhidi ya timu hiyo iliyokuwa ikicheza nyumbani.

Katika mchezo huo ambao haukuwa na mvuto wa kutosha na nafasi chache za kufunga Son Heung Min alidhihirisha kuwa ni mmoja kati ya wachezaji ambao wanaweza kubadili matokeo na kupachika bao pekee usiku huo katika dakika ya 62 ya mchezo.

 Leo VFL Wolfsburg inaikaribisha Mainz , wakati Bremen inakibarua na Borussia Dortmund. Pambanoi la watani wa jadi linafanyika huko mkoani Bavaria ambapo Nürnberg inatiana kifuani na miamba wa Bundesliga Bayern Munich.

Alipoulizwa kuhusu pambano hilo kocha wa Bayern Pep Guardiola amesema lolote linaweza kutokea, kwani pambano la watani wa jadi mara zote halitabiriki. Lakini amesisitiza kuwa kikosi chake kinataka kuhakikisha kuwa hakipotezi mchezo.

Freiburg inamiadi na Hoffenheim , Eintracht Frankfurt inaikaribisha Eintracht Braunschweig , wakati Hamburg itaoneshana kazi na Hertha BSC Berlin.

Kesho Jumapili (09.02.2014) ni zamu ya Stuttgart kuoneshana kazi na Augsburg na Schalke wanaikaribisha Hannover nyumbani.