TFF YAWAVURUGA WANACHAMA WA COASTAL UNION YA TANGA JUU YA MAAMUZI YA KUFUBAZA MADARAKA YA MAKAMU WA MWENYEKITI

Release No. 137

TAARIFA KWA VYOMBO VYA HABARI

Agosti 13, 2014

TFF HAITAMBUI MABADILIKO YA UONGOZI COASTAL UNION

Shirikisho la Mpira wa Miguu Tanzania (TFF) halitambui mabadiliko ya uongozi ndani ya Coastal Union yanayodaiwa kufanywa na mkutano wa wanachama wa klabu hiyo uliofanyika hivi karibuni.

Uongozi wa Coastal Union uliochaguliwa na mkutano wa uchaguzi wa klabu hiyo ndiyo ambao tunautambua, na tutaendelea kufanya nao kazi, na sio uongozi mwingine wowote ule.

Tunapenda kuwakumbusha wanachama wetu (ikiwemo Coastal Union) kuheshimu katiba ya TFF pamoja na katiba zao, kwani hazitambui mapinduzi ya uongozi wala kamati za muda za utendaji. TFF inafanya kazi za kamati za utendaji zilizopatikana kwa njia ya uchaguzi tu.

Tayari tumepokea barua kutoka kwa Kaimu Mwenyekiti wa Coastal Union, Steven Mnguto ikilalamikia kusimamishwa kwake.

Hivyo, tunafuatilia suala hilo kwa kina, na ikibainika kuwa kuna viongozi wamehusika katika mapinduzi hayo watafikishwa katika vyombo husika kwa hatua zaidi.

BONIFACE WAMBURA

OFISA HABARI NA MAWASILIANO

SHIRIKISHO LA MPIRA WA MIGUU TANZANIA (TFF)

TAARIFA YA COASTAL UNION KWA WANAHABARI

UONGOZI wa Klabu ya Coastal Union umesema kikao cha wanachama kilichoketi mwishoni mwa wiki iliyopita kilikuwa na agenda kuu mbili ikiwemo kumjadili Mwenyekiti wao aliyejiuzulu Hemed Aurora pamoja na utendaji wa Makamu Mwenyekiti na sio kumuondoa madarakani kiongozi huyo kama inavyofikiriwa na wadau wa michezo hapa nchini.

Mkutano huo wa dharura uliitishwa na wanachama hao kwa mujibu wa katiba ya Coastal Union ibara 22 kifungu namba 4 na 5   uliofanyika kwenye ukumbi wa klabu hiyo barabara 11 jijini Tanga.

Katika kikao hicho kilichohudhuriwa na wanachama wapatao 142 kwa pamoja walikubaliana kujiuzulu kwa Mwenyekiti wa Klabu ya Coastal Union lakini wakisisitiza kuwa makamu mwenyekiti wa Klabu hiyo Steven Mguto kumdumaza kiutendaji na sio vyengivyo ikimaanisha kumsimamisha katika utendaji wake wa kazi za kila siku wala hajafukuzwa katika nafasi yake hiyo.

Ufafanuzi huu unatokana na taarifa  iliyotolewa na shirikisho la soka nchini TFF ikieleza kuwa uchaguzi uliofanyika ndani ya klabu ya Coastal Union hivi karibuni ni batili kitendo ambacho sio kweli kama kulifanyika uchaguzi kwenye mkutano huo bali ni mkutano ambao uligusa agenda hizo mbili.

Akizungumza na waandishi wa habari jijini Tanga jana,Ofisa Habari wa Coastal Union,Oscar Assenga alisema wanashangaa kuona shirikishao la soka nchini TFF wanalivalia njuga suala hilo wakati bado hawajapata miktasari ya mkutano huo ambao uliitishwa na wanachama.

Assenga alisema kinachotakiwa kufanyika hapo ni Makamu Mwenyekiti yeye binafasi baada ya kupewa tuhumu hizo anapaswa kujitetea kwenye kamati ya maadili ya klabu hiyo na sio shirikisho la soka nchini kwani kufanya hivyo atakuwa amekiuka taratibu zilizopo kisheria.

MWISHO.