mwasikili kuongoza Twiga dhidi ya Ethiopia kesho.

Mlinzi wa timu ya taifa ya Tanzania ya wanawake Sofia Mwasikili anayecheza soka ya kulipwa katika klabu ya LULEBURGAZGUCU ya nchini Uturuki kesho anatarajiwa kuongeza nguvu katika kikosi cha TWIGA STARS watakao kuwa wakikabiliana dhidi ya akina dada wenzao wa Ethiopia mchezo wa kuwania kufuzu fainali za mataifa ya Afrika kwa wanawake.

Mwasikili aliyewasili nchini wiki iliyopita anatarajiwa kuwa nguzo muhimu katika kikosi hicho ambacho kinahitaji ushindi ili kuweza kusonga mbele katika fainali ya mataifa ya Afrika kwa wanawake na timu hiyo ikihitaji ushindi wowote bila kuruhusu lango lao kufungwa.

 Katika mchezo wa awali uliochezwa jijini Addis Ababa Twiga ililala kwa mabao 2-1 hivyo katika mchezo wa kesho inahitaji ushindi wa bao moja au zaidi ili kufuzu kwa fainali hizo.

Hii leo timu hiyo imetembelewa na mkuu wa mkoa wa Pwani Bi Mwamtum Mahiza ambaye amewataka wachezaji wa Twiga Stars kujituma na kuweka uzalendo wao mbele na kwamba akina dada hao wanaweza na hivyo kutumia mafunzo ya waalimu wao kuweza kupata ushindi.

Pia Mahiza amewataka watanzania kujitokeza kwa wingi kwenda kuwapa nguvu wachezaji hao kwani wao kama  viongozi wanawake wako nyuma yao na hivyo wacheze kwa juhudi na hekima na bila shaka watashinda.