 |
| Mkurugenzi wa ufundi wa TFF Sunday Barton Kayuni. Shirikisho la soka duniani FIFA limetoa beji zake kwa waamuzi 13 wa Tanzania wakiwemo waamuzi watano wa kati ambao karibu wote ni wale waliokuwepo katika orodha ya waamuzi wa kati toka mwaka jana. |
Akiwataja
waamuzi hao kwa waandishi wa habari, afisa habari wa TFF Bonface Wambura
amesema kuna upungufu wa maamuzi wawili kutoka katika orodha iliyopitishwa huko
nyuma na FIFA, ambapo badala ya waamuzi 15 wa awali waliokuwa na beji hiyo sasa
kuna waamuzi 13.
Waamuzi
wakati ambao majina yao yamerudi tena yakiwa na beji hiyo ni pamoja na waamuzi
5 wa kati ambao ni Israel Mujuni, Oden Mbaga, Sheha Waziri, Judith Gamba(mwanamke)
na Ramadhani Kibo.
Waamuzi wasaidizi
ni Ally Kinduru, Ferdinand Chacha , Samweli Mpenzu, Hamisi Chang’walu, John
Kanyenye, Mwanahija Makame(mwanamke), Josephati Burali, Erasmo Clemence.
Kwangu mimi
idadi ya waamuzi wenye beji hiyo kupungua kwa waamuzi wawili tu wala hainipi
homa, kinachonisumbua ni kuona waamuzi wa Tanzania wanaendelea kuwa ni waamuzi
wa ligi za soka nchini Tanzania peke yake na si katika michuano mikubwa kama
fainali za mataifa ya Afrika AFCON na kombe la dunia.
Nimezoea
kusikia na kuambiwa na TFF kuwa waamuzi wa Tanzania wameteuliwa kwenda
kuchezesha michezo ya klabu bingwa Afrika na kombe la shirikisho barani Afrika tena
ile michezo ambayo wala haina mvuto, lakini inapofika michuano mikubwa kama
AFCON unachoka kabisa kwani hakuna hata harufu ya majina ya watanzania katika
uteuzi wa waaamuzi.
Vita yangu
naielekeza ndani kabisa ya kitengo cha ufundi cha TFF kinachoongozwa na kaka
yangu ninaye muheshimu sana katika tasnia ya soka Sunday Burton Kayun ambaye
mbali ya kuwa mchezaji wa kiwango cha juu kabisa katika miaka ya nyuma pia ni
kocha mkubwa na mwenye historia nzuri ya kufundisha mpira wa miguu.
Naanza kwa
kumuuliza ndugu yangu tatizo nini? Mbona tunaendelea kukanyagwa wa CAF na FIFA
na wewe upo? Basi hata kukoroma kidogo wajue kuwa upo ofisini na unatimiza
wajibu unashindwa kuwakoromea hao CAF kwa tabia yao ya kutufanya hatujui kitu.
Naomba
usinijibu kwa majibu rahisi na pengine ukatupia lawama kwa chama cha waamuzi FRAT
na kamati yenu mliyounda ya waamuzi, hili ni la kwako bwana Kayuni. Hii ni aibu
kukosa waamuzi kutoka Tanzania katika fainali za mataifa ya Afrika AFCON na kombe la dunian kila mwaka yanapofanyika.
Swali
lingine kwani wao wanatuzidi nini kama sheria 17 ni zilezile na tafsiri yake ni
ile ile mabadiliko ni kidogo sana na yanategemea kama kuna haja ya kufanya
hivyo.
Kaka kitengo
kimekushinda hakuna faida ya semina wala kopa test za waamuzi za kila mwaka.
Wenzetu
wamesikitishwa sana kwa taifa la soka kama Nigeria lenye sifa kubwa katika soka
duniani na wakiendesha ligi ngumu ya soka nchini kwao kwa kuona shirikisho la
soka barani Afrika CAF kwa mara nyingine likiendelea kuwapuuza waamuzi wa
Nigeria mara baada ya kutangaza jumla ya waamuzi 18 ambao watasimamia michezo
ya fainali za mataifa ya Afrika nchini Afrika kusini kuanzia January 19 mpaka February
10.
Na Rockersports ikajaribu kuangalia kwa makini
orodha hiyo kurudia na kurudia bila mafanikio ya kuona angalau safari hii
pengine wamewanyima Nigeria labda tumepewa sisi na pengine tumekumbukwa kwa mwamuzi
wa Tanzania japo mmoja kuchezesha michezo ya fainali hizo kubwa zenye heshima
barani Afrika na duniani kwa ujumla.
Katika
orodha hiyo kuna mwamuzi wa pembeni wa siku nyingi kutoka nchini Nigeria Edibe
Peter Elgam naye akiwemo katika orodha ya waamuzi wa pembeni 21 hapo ndipo
nilipo mkumbuka Hamisi Changwalu, Samweli Mpenzu na John Kanyenye wa Tanzania ambao
karibu kila mwaka wanarejeshwa katika orodha ya waamuzi waliopata beji ya FIFA
lakini wanaishia kuchezesha Simba na Yanga, Mtibwa na Azam au JKT Ruvu na
Mgambo JKT.
Kuna waamuzi
wawili kutoka nchini Afrika kusini ambao ni si wamuzi wazoefu sana Daniel
Bennett na Zakhele Siwela ambao wanaendelea na kazi ya kutafsiri sheria 17
viwanjani na kumefanyika mabadiliko katika kundi la waamuzi wa kati wawili tu
lakini katika kundi la waamuzi wa pembeni kuna waamuzi wapya 8 kutoka wale
waliosimamia michezo ya fainali ya mwaka jana kule Equatorial Guinea na Gabon mwaka
mmoja uliopita.
Hapo ndipo
nilipo tazama tena katika mabadiliko ya waamuzi wasaidizi 8 hivi kweli waamuzi
wa Tanzania wamekosa sifa ya kuchomekewa katika hao wapya 8 kuelekea nchini Afrika
kusini kunako AFCON? Nilibaki nimeduwaa na nikitoa neno labla kuna namna au inawezekana
tumerogwa.
Orodha ya
waamuzi wa AFCON 2013 imemjumuisha mwamuzi wa kati kutoka nchini Mali ambaye
anaaminika kuwa mwamuzi bora kuliko wote barani Afrika na mwenye uzoefu wa muda
mrefu huyu si mwingine bali ni Kolan Coulibaly.
Komlan
Coulibaly alikuwepo kwenye fainali za mwaka 2010 nchini Angola kama ilivyokuwa
kwa Badara Diatta ambaye baadaye alikabidhiwa filimbi katika mchezo wa fainali
kati ya Zambia na tembo wa Ivory Coast mjini
Libreville na Zambia kutwaa taji hilo.
Coulibaly
kwasasa ana umri wa miaka 42, atakuwa anaweka rekodi ya mwamuzi aliyechezesha
michezo mingi ya fainali za AFCON endapo atakabidhiwa tena filimbi nchini
Afrika Kusini na bila shaka atafanya hivyo kwa kuwa ameshatajwa kwenye orodha.
Haya yatakuwa
ni mashindano ya 7 kwake tangu aanze kuchezesha fainali hizi alipoitwa kwa mara
ya kwanza mwaka 2002.
Waamuzi
wengine wapya walioitwa safari hii ni kutoka nchi jirani ya Kenya huyu ni Sylvester
Kirwa na mwingine ni kutoka Seychelles Bernard Camille.
Hivi ni kweli Kirwa ambaye alichezesha mchezo wa Star na Zambia mwezi Disemba mwaka jana ana kiwango kikubwa sana cha kumzidi Oden Mbaga wa Tanzania kama si kujidharau wenyewe na kutokuwa na tabia ya kujifanyia promo wenyewe.
Hii ndio faida ya kufagilia vya wenzetu sasa inatuponza.
 |
| Mwamuzi Oden Mbaga katikati. |
 |
| Mwamuzi Izrael Mujuni mwenye mpira. |
Algeria na Senegal
zenyewe zina idadi kubwa ya waamuzi 3 kutoka kila nchi.
Algeria ina
mwamuzi mzoefu Mohamed Benouza mbaye kwake hizi zitakuwa ni fainali za 5
kuchezesha wakati ambapo Diatta amekuwepo katika kila fainali tangu mwaka 2006.
Zitakuwa ni
fainali za tatu mfululizo kwa Bennett na za pili kwa Siwela. Wote pia wapo
katika orodha fupi ya waamuzi walioteuliwa tayari kwa ajili ya fainali za kombe
la dunia nchini Brazil mwaka 2014.
Sasa Sunday
Kayuni narudi tena kwako ina maana zile semina za waamuzi ambazo wanakuja
wakufunzi wa CAF na FIFA karibu kila mwaka hazina faida kwa watanzania? Na kama
semina zinaandaliwa na CAF na FIFA tunashindwa kuwaambia ukweli au watuambiye
kufanye namna gani ili kuhakikisha na sisi waamuzi wetu wanakuwepo michuano
mikubwa na kuingia moja kwa moja katika mchakato wa kutangaza orodha ya waamuzi
wa michuano kama hii.
Tanzania
kupitia TFF ni wanachama wa CAF na FIFA na wewe ndio mkurugenzi wa ufundi kitengo
ambacho ndiyo jiko na jicho la mpira wa nchi yoyote duniani pigania waamuzi wa
nchi yako baba, waafrika tuna tabia ya uchoyo wenzetu wanatunyima kwa uchoyo
wao tu lione hili. Si kweli kwamba hatuwezi, tunaweza sana isipokuwa tuko nyuma
sana na tumekubali kunyimwa.
Au tumefutwa
uanachama wa CAF na FIFA. Tunajiweka mbali sana na tunadhani mpira uko katika
nchi fulani, huu ni utumwa wa mawazo. Ndio maana niliwahi kuandika katika moja
ya makala yangu kuwa, TFF na shirikisho la baraza la vyaka vya soka Afrika
mashariki na kati sasa umefika wakati wa kuacha kumuogopa Rais wa CAF Issa
Ayatou hana faida kwenu na wala hakuna sababu ya kumuunga mkono mtu ambaye
hajali soka la ukanda wenu.
Nilikuwa na
maana ya kwamba mpira wa ukanda huu utaendelea kudumaa kwa kumuunga mkono
Ayatou ambaye nyie kama viongozi mmeutangazia umma kuwa mtakwenda kumpa kura
kwenye uchaguzi wa mwezi machi. Hiyo kura si ya watu wa Afrika mashariki na
kati hizo kura ni zenu wenyewe. Hatumuungi mkono huyo mtu sisi.
Narudi
kwenye mada kaka yangu Sunday Kayuni badilisha waamuzi wa Tanzania na pigania
nafasi zao barani Afrika ni heshima kubwa kwao kuchezesha AFCON na si CECAFA na
michezo ya vilabu Afrika.
No comments:
Post a Comment