Masikini United: Manchester United kumkosa Vidic michezo mitatu baada ya kushindwa rufaa yake.

Nahodha wa Manchester United Nemanja Vidic atakosa mechi ya nusufainali ya marudiano katika League Cup dhidi ya Sunderland uwanjani Old Trafford Jumatano baada ya kushindwa kubatilisha kadi nyekundu aliyopowa wikendi iliyopita.

Mlinzi huyo wa kati mwenye shughuli kubwa aliwasilisha malalamishi ya kutolewa uwanjani bila hatia baada ya kuonyeshwa kadi nyekundu wakati wa mechi ya Ligi ya kuu ambapo mabingwa United walilazwa 3-1 na Chelsea uwanjani Stamford Bridge Jumapili. Vidic alidaiwa kumchezea visivyo Eden Hazard.

Vidic alionyeshwa kadi nyekundu moja kwa moja, ambayo kawaida huandamana na marufuku ya kutocheza mechi tatu.

Tume huru ya kinidhamu ilithibitisha jana Jumanne kwamba marufuku hiyo itatekelezwa “mara moja”, kuanzia mechi ya leo Jumatano ambapo United wanajaribu kupindua matokeo ya kufungwa mabao 2-1 walikopokezwa mechi ya mkondo wa kwanza. 

"Malalamishi ya Nemanja Vidic wa Manchester United kwamba alifukuzwa uwanjani kimakosa yamekataliwa na tume huru ya kinidhamu,” ilisema taarifa iliyotolewa na Shirikisho la Soka la Uingereza Jumanne. 

"Kwa hivyo, marufuku ya mechi tatu kwa mchezaji huyo inaanza kutekelezwa mara moja. Vidic alionyesha kadi nyekundu kwa kucheza vibaya wakati wa mechi ya timu yake dhidi ya Chelsea Jumapili 19 Januari 2014.”

Mserbia huyo wa miaka 32 pia atakosa mechi za United katika ligi dhidi ya Cardiff City nyumbani na ugenini dhidi ya Stoke City.

United walizoea kutojishughulisha sana na League Cup chini ya meneja wa zamani Alex Ferguson, ingawa walishinda kikombe hicho mara nne chini ya raia huyo wa Scotland na badala yake walisaka vikombe vya hadhi zaidi.

Lakini kufuatia kichapo cha Jumapili ambacho kimeacha timu hiyo ya David Moyes alama 14 nyuma ya viongozi wa Ligi ya Premia Arsenal, na baada ya kubanduliwa Kombe la FA na Swansea City, United wanahitaji sana ufanisi katika League Cup.