MOURINHO: 'DNA' IMEREJEA REAL MADRID, Ronaldo: Naweka shida chini naweka mikono juu, Sergio Aguero: Ningeitumikia Real Madrid wakati ule kama wangenitaka NA Jallet: jitihada zetu zimelipwa kwa ushindi mkubwa.

MOURINHO:  'DNA' IMEREJEA REAL MADRID

Kocha wa Real Madrid Jose Mourinho amepaza sauti yake iliyokuwa na nakshi za furaha baada ya kikosi chake kilichokuwa mara kadhaa nyuma kimatokeo na baadaye kupata ushindi wa mabao 3-2 dhidi ya mabingwa wa ligi kuu nchini England Manchester City katika mchezo wa michuano ya vilabu bingwa barani ulaya uliopigwa katika dimba la Bernabeu.

Los Blancos iliyokuwa nyuma kuelekea dakika za mwisho na ilipata mabao yake mawili ndani ya dakika tatu za muda wa kawaida wa mchezo kupitia kwa Karim Benzema na Cristiano Ronaldo, na kujihakikishia points tatu muhimu katika mchezo ambao ulikuwa mgumu usiku wa jana.

Amenukuliwa kocha huyo na na kituo cha television cha ITV akisema

"ni vizuri kwa kuwa 'vina saba' kwa wachezaji wangu vimerejea."

"Real Madrid inaweza kupoteza mchezo , Mourinho anaweza kupoteza mchezo, wachezaji wangu wanaweza kupoteza mchezo , na tungeweza kupoteza mchezo usiku huu. 

Tungeweza kupoteza, najivunia kwani tungeweza kupoteza kama ilivyokuwa kwa Sevilla na Getafe na furaha yangu si kwasababu nimepata points tatu ni kwasababu DNA imerejea katika timu yangu."

Baada ya huko nyuma kuongea kwa mtazamo hasi kutokana na kiwango kibovu cha timu yake katika ligi ya Hispania La Liga, jana  Mourinho alikuwa mwenye furaha na kusema wachezaji wake wameonyesha thamani zao.

"wamedhihirisha kwangu kuwa wanaweza. Kama wanataka kuwa wachezaji wa kiwango cha juu na uweledi mkubwa, kama wanataka kuheshimu historia ya Real Madrid, basi kila mechi si tu dhidi ya City au  Barcelona, isipokuwa kila mchezo na wanaweza kufanya hivyo kwasababu msimu uliopita walidhihirisha hilo".

"kama ningekuwa kocha wa timu ndogo ningeweza kupoteza mchezo mara nyingi zaidi, lakini nikiwa kama kocha wa  Real Madrid siwezi kukubali hilo.

Nimefurahia sana wachezaji wangu walivyofanya kwa kuwa ni ushindi mkubwa dhidi ya timu kubwa. Huo ndio mpira wa miguu tulistahili kushinda.

Jallet: jitihada zetu zimelipwa kwa ushindi mkubwa

Nahodha wa Paris Saint-Germain Christophe Jallet amepongeza timu yake kwa jitihada kubwa waliyofanya kiasi kupelekea washindi hao wa pili wa msimu uliopita katika ligi kuu ya nchini Ufaransa Ligue 1, kuibuka na ushindi mnono wa mabao 4-1 dhidi ya Dinamo Kiev mchezo wa kundi A wa ligi ya mabingwa barani ulaya uliopigwa kule Parc des Princes usiku wa jana.

Timu hiyo toka katika jiji la Paris hii ni mara yao ya kwanza kucheza michuano ya vilabu bingwa tangu mwaka December 2004, ambapo jana walionyesha mchezo safi na kumiliki mchezo kiasi kipindi cha kwanza kufanikiwa kupata mabao matatu kupitia kwa Zlatan Ibrahimovic na Thiago Silva na Alex akitumbukiza goli la tatu kabla ya mapumziko.

Licha ya Miguel Veloso kufanikiwa kuandika bao la kufutia machozi kwa wageni toka Ukraine , bado Javier Pastore akaendelea kutupia bao lingine la nne na kuipeleka PSG katika uongozi wa  kundi A.

Jallet amesema kikosi chao kimesukwa vizuri na ndio maana ushindi ulikuwa rahisi lakini akiweka wazi kuwa mchezo unaofuata wa kundi hilo dhidi FC Porto, utakuwa mgumu.

Amenukuliwa na UEAF.com akisema

"tumetawala kila eneo ushambuliaji na ulinzi. Jitihada zetu zimelipwa na ushindi mnono, tumeweza kuonyesha kiwango cha michuano ya vilabu bingwa usiku huu, sasa safari yetu kwenda Porto itakuwa kipimo kingine kigumu."

Sergio Aguero: Ningeitumikia Real Madrid wakati ule kama wangenitaka

Sergio Aguero amesema kuwa endapo Real Madrid itaonyesha nia ya kumtaka yuko tayari kuelekea Santiago Bernabeu, ambapo pia ameongeza kwa kusema mwaka jana 2011 alikuwa hana chaguo lingine isipokuwa kujiunga na  Manchester City.

Nyota huyo wa kimataifa raia wa Argentina alijiunga na City akitokea Atletico Madrid majira ya kiangazi mwaka jana kwa ada ya pauni milioni 38 na amefanikiwa kuifungia klabu hiyo jumla ya mabao 23 katika ligi kuu ya England ikiwa ni pamoja na goli ambalo liliipa ubingwa City katika ligi kuu ya England .

Wakati wa kipindi cha uhamisho wake, Aguero alihusishwa kutaka kuelekea katika vilabu vingi ikiwemo Real Madrid, lakini mchezaji huyo aliweka wazi kuwa kwa kipindi kile hakuwa na chaguo lingine isipokuwa ni kujiunga na City licha ya Madri kuendelea kumtaka.

Amenukuliwa baada ya mchezo wa jana ambao City ilichapwa kwa mabao 3-2 na Real Madrid amesema

"Wakati Madrid ikinitaka nilikuwa tayari nimeshajiunga na City na  sikuwa na chaguo lingine isipokuwa kusaini na Manchester City,"

 Taarifa za kuelekea Real Madrid za Aguero zilikolezwa na vyombo vya habari lakini kipaumbele ilikuwa ni kujiunga na City, lakini pia ikaarifiwa kuwa aliogopa kujiunga na mahasimu wao wakubwa katika soka la Hispania, Atletico, kwani ingekuwa hivyp ni kuisaliti klabu yake jambo ambalo amelikanusha hakuwahi kusema hivyo.

"Sikuwahi kusema kuwa sitaichezea Madrid kamwe kwa kuwa sitaki kuisaliti  Atlético,"

Mshambuliaji huyo kupitia ukurasa wa mtandao wake wa kijamii wa twitter ameandika kuwa anajisikia furaha kuichezea City licha ya kuendelea kutakiwa na Madrid.

 

Ronaldo: Naweka shida chini naweka mikono juu

Cristiano Ronaldo aliweka pembeni kwa muda huzuni na shida zake na kushangilia ushindi wa timu yake ya Real Madrid huku mwenyewe akifunga bao la ushindi dhidi ya Manchester City katika mchezo wa ushindi wa mabao 3-2 mchezo wa michuano ya vilabu bingwa barani ulaya.

Mabingwa hao wa kandanda nchini Hispania walihitaji goli la dakika za mwisho wa mchezo kupitia kwa Karim Benzema ikiwa ni goli la kuswazisha na Ronaldo kugeuza matokeo ya kuwa nyuma kwa mabao 2-1 kuwa ushindi katika mchezo wa ufunguzi wa kundi D.

Akiongea na TVE1 amenukuliwa

“ulikuwa mchezo mzuri sana kwa wale walioona, tumecheza vizuri sana. Kipindi cha kwanza kulitafuta nafasi nyingi lakini tulishindwa kuzitumia na katika kipindi cha pili timu zote Manchester City na sisi tulicheza vizuri.

“tuliamini tungeweza kushinda na tumefanya hivyo. Timu imefanya vizuri sana, tulijua tunaweza kufanya hivyo na tumeonyesha tunaweza.”

Mreno huyo alipoulizwa kuhusiana na alivyoshangilia goli la ushindi hasa baada ya hivi karibuni kunukuliwa kuwa hana furaha alijibu

“ ninashangilia pale ninapopaswa kushangilia mchezo ulikuwa muhimu na tulikuwa vitani” .