Makundi ya Confederations Cup yatajwa.Benitez ajitambua si wa asilimia 100% kupona darajani na Wenger naye hana amani Emirate.

Wenyeji wa michuano ya Confideration Cup Brazil wamepangwa katika kundi moja na Japan, Mexico na Italia katika kundi la ufunguzi wa michuano ya Confederations Cup.

Mabingwa wa kombe la dunia na Ulaya Hispania atakuwa katika kundi moja la B pamoja na nchi za Uruguay na Tahiti pamoja na mshindi wa fainali ya mataifa ya Afrika ambaye atajulikana mwezi Februari.

Michuano hiyo hufanyika kila baada ya miaka minne na kushindanisha mabingwa wa kila bara.

Rais wa shirikisho la soka duniani FIFA Sepp Blatter amepongeza miundo mbinu ya nchi mwenyeji wa fainali hizo Brazil.

Amenukuliwa akisema,

"Mambo mengi yamebadilika katika nchi hii tangu mwaka 1950, Brazil imeendelea sit u katika eneo la utamaduni lakini pia hata katika uchumi”.

Rais wa Brazil Dilma Rousseff pia alikuwepo katika droo hiyo ambapo amesisitiza kuwa viwanja vitakuwa tayari mpaka kufikia wakati ya michuano hiyo.

Benitez ajitambua si wa asilimia 100% kupona darajani.

Rafael Benitez ameweka wazi kuwa hana uhakika na nafasi yake ya kazi kuwa salama kufuatia ndoto yake ya kuanza maisha mapya Chelsea kukumbwa na bahati mbaya baada ya kichapo kutoka kwa West Ham cha mabao 3-1.

Hiyo ina maana kuwa Chelsea sasa imecheza michezo saba bila ushindi katika ligi kuu ya soka nchini England ‘Premier League’. 

Benitez bado anasaka ushindi wa kwanza akiwa ndio kocha wa kwanza chini ya utawala wa mmiliki Roman Abramovich kushindwa kupata ushndi katika michezo miwili ya kuanza kazi yake.

Benitez amekuwa akikumbana na kelele za mashabiki wenye hasira ambao wamekuwa wakionyesha waziwazi hisia zao kwa kutoa maneno na kuandika kwenye mabango "You're not welcome here'' na nyimbo zikiimbwa yakitamkwa maneno "You're getting sacked in the morning".

Benitez yuko katika hali tete kufuatia kuanza kuulizwa juu ya uwezo wake na mmiliki Roman Abramovich ambaye anaonekana kama mmiliki asiyekuwa na subira.

Alipoulizwa kama ana hofu yoyote juu ya uwezekano wa kuondoka Stamford Bridge ndani ya kipindi kifupi, Benitez ambaye mkataba wake unamalizika mwishoni mwa msimu amesema,

 "ningependa kusema kuwa inategemea na mambo yatakavyo kuwa uwanjani. Kwahiyo kama tuta ongeza juhudi uwanjani itakuwa rahisi kwa kila mtu''

 Wenger naye hana amani Emirate

 Arsene Wenger amesema atafanya tathmini juu ya hatma take ya baadaye katika klabu ya Arsenal baada ya msimu kumalizika kufuatia kufanya vibaya dhidi ya Swansea City ambapo walifungwa bao 2-0.

Mabao mawili ya dakika za mwisho yaliyofungwa na Michu yameifanya Arsenal kupoteza sasa jumla ya minne na kuiweka katika nafasi ya 10 katika msimamo wa ligi baada kushuka uwanjani mara 15.

Alikuwa akizomewa na baadhi ya mashabiki kutoka upande mmoja wa uwanja wa Emirates hapo jana sambamba na kukumbwa na upinzani na kundi la 'Black Scarf Movement' ambao wana hasira na matokeo mabovu yanayoendelea kwa timu yao.

Baada ya kupoteza mchezo huo, Wenger aliulizwa kama bado ana hamu ya kuendelea kuishikilia nafasi hiyo ambayo amekuwa nayo tangu mwaka 1996, amejibu,

"hapana, unafanya tathmini mpaka mwisho wa msimu. Najua hali imetibuka kila upande. Ni wakati sasa wa kuungana pamoja na kuonyesha kuwa ni klabu imara"

Alipoulizwa kama anaumizwa na timu hiyo katika hatua hii kuwa katika nafasi ya katikati ya msimamo wa ligi , Wenger amesema

 “Ni kweli. Lakini siogopi kuwepo katika nafasi hiyo. Tunatakiwa kupata ubora tena".