YANGA KUIVAA JKT RUVU TAIFA KESHO, SWALI NI JEE WATAENDELEZA KASI YA TATU TATU?

Young Africans kesho itashuka katika dimba la Uwanja wa Taifa jijini Dar es salaam kucheza na maafande wa jeshi la kujenga Taifa nchini timu ya JKT Ruvu kutoka mkoani Pwani ikiwa ni muendelezo wa michezo ya Ligi Kuu ya Vodacom mzunguko wa 12.

Mara baada ya ushindi wa pili mfululizo wa mabao 3-0 dhidi ya Rhino Rangers na Mgambo Shooting kikosi cha mholanzi Ernie Brandts kimeendelea kuimarika na safu ya ulinzi ikicheza michezo miwili pasipo kuruhusu nyavu zake kutikiswa.

Mpaka sasa Young Africans inashika nafasi ya tatu ikiwa na ponti 22 pointi 1 nyuma ya timu zinaongoza mbili za Azam FC na Mbeya City zote zikiwa na pointi 23 zikitofautiana kwa mabao ya kufunga na kufungwa.

Young Africans inahitaji pointi tatu muhimu katika mchezo huo wa kesho dhidi ya JKT Ruvu ili iweze kujikita kileleni na kukalia kiti cha uongozi wa Ligi Kuu kwa kufikisha pointi 25 ambazo zitaweza kufikiwa na timu mbili tu za Azam FC na Mbeya City ambazo zitachezwa mwishoni mwa wiki.

Timu iliingia kambini jana jioni katika hostel zilizopo makao makuu ya klabu mitaa ya Twiga/Jangwani kujiandaa na mchezo huo ambao ni muhimu kwa vijana wa Jagwani kuhakikisha wanaendeleza wimbi la ushindi na kupata pointi tatu muhimu.

Katika mchezo wa kesho Young Africans itakosa huduma ya wachezaji wake David Luhende na Nizar Khalfani ambao ni majeruhi huku kiungo Haruna Niyonzima akiukosa mchezo huo kutokana na kuwa nchini Rwanda alipokwenda kushugulikia matatizo ya kifamilia.

Wapenzi, washabiki na wanchama wa Young Africans kesho wanaombwa kujitokeza kwa wingi kuja kuwashangilia vijana katika mchezo wao dhidi ya JKT Ruvu.