Edison Arantes do Nascimento ‘Pele’ afanyiwa upasuaji wa nyonga, Patrice Evra anasema ana njaa na mataji ya kimataifa, Bony wa Vitesse kujiunga Chelsea Januari, Raobinho anaitaka Santos na Zlatan Ibrahimovic ana mwambiaSteven Gerrard aachane na soka la England.

Pele apata nafuu baada ya kufanyiwa upasuaji wa nyonga.

Nyota wa zamani wa klabu ya Santos na timu ya taifa ya Brazil ambaye pia ni alama muhimu katika ulimwengu wa soka Edison Arantes do Nascimento ‘Pele’ amefanyiwa upasuaji wa nyonga na inaarifiwa ya kwamba anaendelea vizuri baada ya kuwa katika uangalizi mzuri mjini Sao Paulo.

Pele ambaye kwasasa ana umri wa miaka 72, alifanyiwa upasuaji huo katika hospitali ya Albert Einstein licha ya kwamba hakuna habari zaidi zilizo tolewa ikiwa ni agizo kutoka kwa familia ya gwiji huyo wa soka wa zamani.

Msemaji wake Jose Fornos ameidokeza Agence France-Presse akisema;

"kila kitu kimekwenda vizuri na ulikuwa ni upasuaji mdogo" 

Pele anaangaliwa kama ni mchezaji mkubwa kuwahi kutokea duniani akifunga magoli 1,300 na kushinda mataji matatu ya kombe la dunia katika miaka ya 1958, 1962 na 1970 katika cha uchezaji wake ulio tukuka.

Baada ya kuendelea kushikilia rekodi nyingi za dunia katika soka, hatimaye Pele wiki iliyopita alishuhudia moja ya rekodi yake ikivunjwa na mshambuliaji wa kimataifa wa Argentina na klabu ya Barcelona Lionel Messi ya kufunga magoli 75 katika kipindi cha mwaka mmoja

Evra: Itadhihirisha kushindwa kwangu katika soka endapo sitapata taji lolote na timu ya taifa ya Ufaransa

Mlinzi wa Manchester United na timu ya taifa ya Ufaransa Patrice Evra amesema waziwazi kuwa itakuwa ni sawa na kukosa mafanikio katika maisha yake ya soka endapo atakosa taji akiwa kama mchezaji wa timu ya taifa ya nchi yake ya Ufaransa.

Mlinzi huyo wa pembeni wa zamani wa Monaco alianza kuichezea timu ya taifa ya Ufaransa ‘Les Bleus’ mwaka 2004 na tangu wakati huo amesha ichezea jumla ya michezo 46 akiwakilisha katika michuano mikubwa minne pamoja na kuwa nahodha wa kikosi hicho katika fainali za kombe la dunia mwaka 2010 zilizofanyika nchini Afrika Kusini.

Mlinzi huyo mzaliwa wa Senegal anaamini kikosi cha Ufaransa kwasasa kinasukwa vizuri na kocha Didier Deschamps na kimeanza kuimarika, licha ya matatizo kadhaa kuendelea kuzonga soka la Ufaransa.

Akiongea na gaeti la kifaransa la Gazzetta Dello Sport amesema,

"Baada ya kombe la dunia 2010, Italia imeimarisha namna ya uchezaji wao lakini Ufaransa bado kuna matatizo" 

"nataka kushinda nikiwa na timu ya taifa, itakuwa ni kushindwa endapo nitashindwa kupata taji "

"chini ya Blanc nilipoteza nafasi yangu ya kudumu lakini sasa chini ya Deschamps mambo yamekuwa mazuri. Kocha ameniambia kama nitacheza vizuri nitakupa nafasi ya kudumu.'"

Ufaransa itashuka dimbani dhidi ya Italia katika dimba la Stadio Ennio Tardini mjini Parma usiku huu katika mchezo wa kimataifa wa kirafiki.

Wilfried Bony kujiunga na Chelsea Januari.

Mshambuliaji wa Vitesse Wilfried Bony amekaribisha tetesi juu ya klabu ya Chelsea kutaka huduma yake katika kipindi cha uhamisho cha mwezi January.

Bony mwenye umri wa miaka 23, amekuwa katika kiwango huko Eredivisie tangu kuihama klabu yake ya zamani ya Sparta Prague mwezi January 2011, akiwa amesha pachika wavuni jumla ya mabao 12 baada ya kushuka dimbani mara 11 katika msimu huu.

Mapema mwezi huu wakala wa mchezaji huyo Francis Kacou alinukuliwa akisema,

"kuna vilabu kadhaa vya ligi kuu nchini England vimeonyesha nia ikiwemo Chelsea na Aston Villa"

Katika mahojiano yake na jarida moja la nchini Czech la  Pravo, nyota huyo wa kimataifa wa Ivory Coast alithibitisha kuwa angependelea kuelekea Stamford Bridge.

"sitaki kuongea mengi kuhusu hilo lakini kama imeandikwa kuwa nakwenda huko basi ni kitu kizuri"

 "kama wananitaka nitakuwa ni heshima kubwa. Napenda kujiunga na klabu kama hiyo, napenda soka na England na siogopi kwenda huko. Chelsea ni klabu kubwa"

Mkurugenzi wa michezo wa Chelsea Michael Emenalo hivi karibini alielekea Arnhem kuangalia mchezo baina ya  Vitesse dhidi ya FC Twente ambao ulimalizika kwa sare ya 0-0.

Santos imethibitisha kumtaka Robinho.

Kocha wa Santos Muricy Ramalho ameweka wazi kuwa klabu yake ina matumaini makubwa ya kumrejesha mshambuliaji wa AC Milan Robinho katika uhamisho wa mwezi Januari.

Taarifa kutoka nchini Brazil zimedai Robinho, Nene, Pablo Aimar na Diego ni miongoni mwa wachezaji walio katika orodha ya kocha Ramalho kwa ajili ya msimu ujao wakati ambapo kuna tetesi kuwa huenda klabu hiyo ikampoteza mshambuliaji wake hodari Felipe Anderson.

Mapema wiki hii alikaririwa mwanasheria wa Robinho Marisa Alija akisema Robinho ana matumaini ya kurudi Santos, lakini alikataa kusema itakuwa lini.

"tunasikia mengi juu ya Robinho lakini tukumbuke ana mkataba na Milan mpaka 2014,"

 "hajaniambia chochote juu ya kurejea Santos msimu ujao. Lakini anashindwa kuficha juu ya nia yake ya kurejea lakini katika hatua hii sidhani kama itawezekana."

Ibrahimovic anataka Steven Gerrard ondoke England

Mshambuliaji wa kimataifa wa Sweden Zlatan Ibrahimovic anaamini wakati umefika sasa kwa kiungo mzoefu wa Liverpool Steven Gerrard kuondoka katika soka na England na kujiunga na vilabu vingine vikubwa nje ya nchi yake.

Ibrahimovic ametoka maoni yake hayo wakati huu ambapo Sweden inaelekea kucheza na timu ya taifa ya England maarufu kama Simba watatu mjini Stockholm ukiwa ni mchezo wa kimataifa wa kirafiki.

Muda mfupi baada ya mchezo wao akiwa na klabu yake ya Paris Saint-Germain dhidi ya Liverpool Zlatan alionyesha wazi kumkubali Gerrard, lakini akasema ni muda muafaka kwa Skipper huyo kuondoka Premier League.

"nadhani Steven Gerrard anaheshimika kote barani ulaya,  nafahamu hilo kwasababu mara nyingi kocha huwa anasema kuwa muangalifu na Gerrard kwasababu ndiyo mchezaji anaye leta utofauti uwanjani.

"lakini licha ya Liverpool kuwa klabu kubwa Ulaya, ningependa kumuona Steven katika klabu nyingine kubwa Ulaya.

"kwangu mimi mchezaji mzuri ni yule anaye onyesha utofauti kila sehemu. Nina uhakika Steven Gerrard anaweza."