KAMBI YA YANGA YAHAMIA UTURUKI KUANZIA KESHO KUTWA (JUMAPILI) ALFAJIRI.

 Kikosi cha wachezaji 27 na viongozi 7 wa klabu bingwa Afrika mashariki na kati Yanga kinatarajiwa kuondoka jijini Dar es Salaam hapo kesho kutwa alfajiri ( jumapili) kuelekea Antaria nchini Uturuki kwa ajili ya kuweka kambi ya wiki mbili, ikiwa ni maandalizi ya mzunguko wa pili wa ligi kuu ya soka Tanzania Bara unaotarajiwa kuanza mwishoni mwa mwezi Januari.

Akiongea hii leo na waandishi wa habari, katibu mkuu wa klabu hiyo Laurence Mwalusako amesema tayari matayarisho ya safari hiyo yamekamilika na kwamba msafara huo utaongozwa na mjumbe wa kamati ya utendaji Mohamed Nyenge.

Amesema timu hiyo itaondoka nchini saa 10:00 alfajiri ya Jumapili na inatarajiwa kuwasili katika jiji la Instabul saa 4:50 asubuhi kabla ya kuelekea katika mji wa Antaria ulioko kusini mwa nchi ya Uturuki ambako timu nzima itawasili huko majira ya saa 9:00 alasiri.

Yanga itafikia katika Hoteli Sueno beach Hotel iliyoko katika mji wa kusini mwa Uturuki wa Antari ambako ndiko hasa itakuwa ikiweka kambi yake katika kipindi chote cha ziara yao ya kimazoezi nchi humo.

Mwalusako amesema wachezaji wa Yanga wataelekea uwanja wa ndege wa mwalimu Julias Nyerere saa 6 usiku wa kesho na kwamba kwakuwa msafara una watu wengi hivyo wameonelea kufika uwanjani hapo mapema ili kukamisha taratibu za ukaguzi na mambo mengine mapema.

Kwa upande wake afisa habari wa klabu hiyo Baraka Kizuguto amewataja wachezaji wataondoka kuwa ni magoli kipa watatu Alli Mustafa, Saidi Mohamed na mlinda mlango aliyepandishwa kutoka kikosi cha pili Yusufu abdul.

Walinzi ni Shadrack Nsajigwa,Oscar Joshua, Godfrey Taifa, Juma Abdul, Stephano Mwesika, Nadir Haroub Kanavaro, Kelvin Yondani, Ladislaus Mbogo, na John Twite Mbuyu.

Viungo ni Nurdin Bakari, Haruna Niyonzima,  Nizar Khalfani, Frank Domayo, Athimani Iddi Chuji, David  Luhende.

Washambuliaji ni Kabange Twitte, Didier Kavumbagu, Said Bahanuzi, Rehani Kibingu,Simon Msuva, Hamisi kiiza na George Banda.

Benchi la ufundi litaongozwa na kocha mkuu Ernest Brandts na msaidizi wake Fred Felix Minziro pamoja na kocha wa makipa Razaki Omari Siwa.

Pia Yanga itaondoka na daktari wa timu Sufiani Juma, meneja Hafidhi Salum na afisa habari Baraka kizuguto.

BOFYA KUMSIKILIZA KIZUGUTO