TFF YAITAKIA KILA LA KHERI YANGA MECHI YA LIGI YA MABINGWA DHIDI YA AL AHALY YA MISRI

Mchezo wa kwanza wa kuwania kuingia hatua ya 16 bora wa Mashindano ya Klabu Bingwa Barani Afrika kati ya Yanga ya Tanzania dhidi ya National Al Ahly utafanyika kesho katika Uwanja wa Taifa jijini Dar es Salaam huku tayari tiketi za mchezo huo zikinunuliwa kwa wingi na wapenzi wa soka kwa ujumla.

Young Africans ambao ndio wawakilishi pekee wa mashindano ya kimataifa nchini Tanzania kawa sasa watashuka dimbani kesho kwa lengo moja tu la kuhakikisha historia inaandikwa kwa kuvunja mwiko dhidi ya Waarabu na kuibuka na ushindi katika mchezo huo.

Kikosi cha Mholanzi Hans Van de Pluijm kimekuwa kikiendelea na mazoezi asubuhi na jioni katika Uwanja wa Boko Beach kujiandaa na mchezo huku morali ya wachezaji ikiwa ni ya hali ya juu, saikolojia na kimwili wakiwa tayari kwa mechi.

Kuelekea mchezo wa kesho mchezaji pekee ambaye atakosekana ni Rajabu Zahir kutokana na kupata maumivu ya kuchanika nyama za msuli wa paja 

National Al Ahly ambao waliwasili jumatano asubuhi, hii leo wameendelea na mazoezi yao katika Uwanja wa Taifa kama sheria za shirikisho la soka duniani FIFA zinavyosema tayari kwa kuuzoea kwa mchezo huo wa kesho baada ya hapo awali baada ya kuwasili kuanza kufanya mazoezi kwa siku mbili katika shule ya IST Upanga.

Kwa mujibu wa taarifa kutoka mtandao rasmi ya klabu ya Yanga ni kwamba uongozi wa Young Africans umejiandaa na kuhakikisha kila kitu kinakwenda salama kwa upande wa wachezaji, utawala na washabiki watakaojitokeza kushuhudia mchezo huo ulioteka hisia za wapenzi wengi wa soka barani Afrika.

 Katika hatua nyingine Shirikisho la Mpira wa Miguu Tanzania (TFF) linaitakia kila la kheri yake kwenye mechi yake ya kwanza ya raundi ya 16 bora ya Ligi ya Mabingwa Afrika dhidi ya Al Ahly kutoka Misri.

Mechi hiyo inachezwa kesho (Machi 1 mwaka huu) Uwanja wa Taifa, Dar es Salaam kuanzia 10 kamili jioni. Timu hizo zitarudiana Machi 9 mwaka huu jijini Cairo, Misri.

Maandalizi ya mechi hiyo yamekamilika ambapo kamishna Abbas Sendyowa kutoka Uganda na waamuzi wanne kutoka Burundi tayari wapo nchini kwa ajili ya mechi hiyo inayotarajiwa kuvuta maelfu ya washabiki.

Milango yote katika uwanja huo itakuwa wazi, ukiwemo ule wa upande wa Uwanja wa Ndani (Indoor Stadium) wakati Barabara ya Taifa (Taifa Road) itafungwa kuanzia chuo cha DUCE hadi msikitini kuanzia saa 4 asubuhi.

Magari maalumu yenye sticker pekee ndiyo yatakayoruhusiwa kuingia uwanjani. Vilevile washabiki wanakumbushwa kuwa hawaruhusiwi kuingia uwanjani wakiwa na silaha au vifaa vyovyote vya chuma.

Watanzani wote bila kujali itikadi zao za vilabu kwa ujumla wameombwa kujitokeza kwa wingi kesho kwa lengo la kuiunga mkono Ynaga kwani ndio timu pekee inayowakilisha nchi na kupeperusha bendera ya Taifa katika mashindano ya kimataifa ya vilabu barani Afrika.