SIMBA HAOOOOOOOO ARUSHA MAWINDONI.

  Mabingwa wa soka Tanzania bara Simba kesho wanaelekea mkoani Arusha  tayari kwa ajili ya matayarisho ya kitimtimu cha ligi kuu Tanzania Bara kinachotarajiwa kuanza kutimua vumbi mapema mwezi ujao.

Simba inaelekea Arusha baada ya kumaliza tamasha lake la Simba Day hapo jana tamasha ambalo liliingia doa pale walipokubali kipigo cha mabao 3-1 mbele ya Nairobi city stars ya nchini Kenya.

Afisa habari wa simba Ezekiel Kamwaga ameiambia Rockersports kuwa watakuwa Arusha mpaka siku ya mchezo wa ngao ya hisani august 25 ambapo watakuwa wakicheza dhidi ya washindi wa pili wa ligi ya bara Azam fc.

Kamwaga amesema sababu kubwa ya kuelekea Arusha ni kutokana na ukweli kuwa hali ya hewa ya Arusha ni nzuri na hivyo mwalimu Milovan Cirkovic atapata muda mzuri wa kukisuka kikosi chake vizuri ambacho kimesajiliwa msimu huu.

Wakiwa mkoani Arusha tarehe 18 august Simba itacheza na AFC Leopards ya Kenya ukiwa ni mchezo pekee wa kujipima nguvu kabla ya kurejea jijini Dar es salaam kujiwinda na mchezo wa ngao ya hisani agust 25 dhidi ya Azam fc.

Kumbuka ligi kuu ya soka Tanzania Bara imepangwa kuanza Septemba mosi.