YANGA YAMTAMBULISHA KAVUMBANGU JANGWANI, BAHANUZI AKANUSHA KUJIUNGA SIMBA , KAMATI YA UTENDAJI YANGA KUKUTANA KESHO BILA KUSAHU YANGA KUPELEKA KOMBE LA KAGAME BUNGENI.

 Luis Sendeu afisa habari wa Yanga akimtambulisha Kavumbagu
kwa wanahabari

 Sendeu hii ndiyo jezi ya mshambuliaji wetu mpya Kavumbagu

Jezi yake nambari 11 mgongoni

Didier Kavumbangu akionyesha jezi aliyokabidhiwa na Yanga



Afisa habari wa Yanga Luis Sendeu katikati  akitoa utambulisho wa Didier Kavumbangu
kushoto ni Said Bahanuzi

Kavumbangu akitoa neno lake la moyoni kwa mashabiki waliomlaki hii leo
nje ya makao makuu ya klabu ya Yanga.

Saidi Bahanuzi akiongea na mashabiki wa timu ya Yanga makao makuu ya
klabu hiyo Jangwani.

Klabu ya Yanga ya jijini Dar es Salam ambao ni mabingwa wa kombe la kagame hii leo imemtambulisha mbele ya  waandishi wa habari mchezaji wao mpya Didier Kavumbagu ambaye amejiunga na klabu hiyo akitokea Atletico ya nchini Burundi.

Utambulisho wa Kavumbagu umefanywa na afisa habari wa Yanga Luis Sendeu ambaye amesema mchezaji huyo ameingia mkataba wa miaka miwili wa kuitumikia klabu hiyo yenye maskani yake katika makutano ya mitaa ya Twiga na Jangwani na amekabidhiwa jezi nambari 21.

Akiongea na wanahabari Kavumbagu mwenyewe amesema kuwa amefurahia kujiunga na klabu hiyo ambayo ni kubwa Afrika mashariki na kwamba atatumia uwezo wake wote kuitumikia na kuipa mafanikio.

Pia amefurahishwa na namna alivyopokewa na mashabiki wa klabu ambao wameonyesha kuwa na imani naye na yeye akiahidi kuwa hatawaangusha.
Kavumbangu aliwasili rasmi nchini usiku wa jana na hii leo ameanza mazoezi na timu ya Yanga yaliyofanyika katika shule ya sekondari ya Loyola iliyoko Mabibo jijini Dar es Salaam.

Aidha msemaji wa Yanga Luis Sendeu amesema klabu ya Yanga kesho saa nne asubuhi itawasimika madarakani rasmi viongozi wapya wa klabu hiyo na usimikaji huo utaongozwa na mama Fatma Karume ambaye ni miongoni mwa wadhanini wa klabu hiyo, hafla ambayo itafanyika makao makuu ya klabu hiyo.

Hafla hiyo itafuatiwa na kikao cha kwanza cha kamati ya utendaji tangu viongozi hao kuingia madarakani wakiongozwa na mwenyekiti wao Yusufu Manji na  baadaye saa nane mchana kabla ya timu ya Yanga itaanza  safari ya kuelekea Bungeni kulipeleka kombe la Kagame ikiwa ni ombi la baadhi ya wabunge ambao ni wapenzi wa klabu hiyo.

Wakati hayo yakiwa hivyo mshambiliaji wa mabingwa hao wa kombe la Kagame Said Bahanuzi ametumika mkutano huo wa utambulisho wa Kavumbagu kukanusha taarifa zilizo zagaa kuwa amejiunga na mabingwa wa ligi kuu ya Tanzania bara Simba.

Bahanuzi amesema taarifa hizo hazina ukweli wowote na kwamba yeye ni mchezaji wa Yanga na ana mkataba wa miaka miwili na atautumikia mpaka umalizike.

Katika hatua nyingine viongozi wa klabu hiyo wanatarajiwa kumzawadia mfungaji bora wa michuano ya kombe la Kagame Said Bahanuzi ambaye alimaliza michuano hiyo akifunga jumla ya mabao 6.