Nyota Airtel Rising Stars waanza maandalizi.

Meneja Uhusiano Airtel Tanzania Jackson Mmbando, akiongea na waandishi wa habari leo Jijini Dar es Salaam juu ya kuanza maandalizi kwa ajili ya michuano ya kimataifa ya Airtel Rising Stars itakayofanyika Nairobi, kuanzia Agosti 20 mwaka huu. Kulia ni Afisa Maendeleo TFF Salum Madadi. Tukio hilo limefanyika kwenye ofisi za TFF.

Wawakilishi wa Tanzania kwenye michuano ya kimataifa ya Airtel Rising Stars, itayofanyika Jijini Nairobi, Kenya kuanzia Agosti 19 mpaka 25 wameanza maandalizi yao kwenye Uwanja wa Karume, jijini Dar es Salaam.

Michuano hiyo ya vijana wenye umri chini ya miaka kumi na saba itawaleta pamoja wachezaji takribani 500 kutoka nchi 15. Nchi hizo ni Uganda, Malawi, DRC, Congo Brazzaville, Nigeria, Ghana, Zambia, Niger, Gabon, Burkina Fasso, Sierra Leone, Chad, Madagascar, Tanzania na wenyeji Kenya.

Timu ya Tanzania itawakilishwa na wachezaji 16 waliochaguliwa kwa kufanya vizuri kwenye michuano ya fainali ya taifa ya Airtel Rising Stars iliyofanyika kwenye Uwanja wa Karume mwezi Juni mwaka huu.

Bingwa wa michuano hiyo, licha ya kutunukiwa nishani, atapewa kombe na kupata fursa ya timu nzima kushiriki kwenye kliniki ya soka ya kimataifa itakayofanyika Nairobi kwenye ya ukufunzi wa waalimu wa soka ya vijana kutoka klabu za Manchester United na Arsenal za Uingereza.

Akiongea na waandishi wa habari kwenye Ofisi za TFF leo, Afisa Uhusiano Airtel Tanzania Jane Matinde alisema kampuni ya Airtel imeamua kufanya kazi kwa karibu na chama cha Mpira wa miguu cha Dar es Salaam (DRFA) katika kuvumbua vipaji vinavyochipukia.

‘Tunafuraha sana kwa mpango huu. Ninaamini wachezaji watakaotuwakilisha kwenye hii michuano ya Bara la Afrika ya Airtel Rising Stars huko Nairobi watatuletea heshima kubwa sisi Watanzania.’ Alisena Matinde.

Kikosi cha Tanzania kinaundwa na wachezaji wafuatao – Denis Richard, Juma Hamza, Abdul Selemani, Ishaka Shekolowa, Bakari Ally, Abdulatif Mohamed, George Joseph, Badilu Said, Said Kassim, Amos Ikungula, Paul Balama, Goodluck Mabiku, Joel Kasimula, Ibrahim Mtenga, Sntkony Angelo na Suleiman.

Airtel Rising Stars ni mpango kabambe wa kuibua na kukuza vipaji vya wanasoka wanaochipukia barani Afrika. Walengwa ni wavulana na wasichana wenye umri chini ya miaka kumi na saba ambao watapata fursa ya pekee ya kuonyesha vipaji vyao mbele ya wataalamu wa mpira wa miguu wa kitaifa na kimataifa.